Наши телефоны:
                       (8722)
681-454  681-496
 

Новости


<<все новости
25.02.2015
«Диеги бокьун бугеб куцха дадаян ах1изе».

 

«Дида бугеб гIайиб щиб?» спектакль щибаб магIарул росулъ, школалда бихьизабизе мустахIикъаб буго. Нилъер гIумруялъулъ тIегьан бачIараб нич тIагIин, цоцазул адаб хвезаби, хъарцинлъи, мацIихъанлъи какула гьениб.
Рокьи киназулго ккола. Амма киназулго гуро гьеб талихIаб букIунеб. БитIккечIеб рокьиги гьелдаса лъугьараб рижиялъул талихIкъосараб къисматги бихьизабуна араб анкьалда Авар театралъул сценаялдаса.
«Берцинай, чалухай, росдаего гIахьалай» - гьединал мухъал руго цо халкъияб кочIолъ. Берцинлъиялда цадахъ гIакълу гьечIони, чIужугIаданалъул гIумру кIалагъоркье ккезе бегьула. Гьедин ккана Б. Турайил пьесаялъул аслияв багьадур Мирзаханил (артист ХIайбула Хасаев) эбел Диляралги (ДРялъул мустахIи къай артистка Амантулла Къебедова). Берцинай йикIиналъ рукъалъул ва хур-хералъул хIалтIуда хъвазе толароан гьей эбелалъ. КъваригIел тIубазе кидаго ятулаан цогидай яс – Зарипат (ДРялъул мустахIикъай артистка Наира ХIабибулаева). Еэдун, гогьдаризаюн гIурай Диляраца балъго гьабураб лъимер яцалъухъе рехун тола. Бигьаяб жойищха магIарул чIужугIаданалъе гьеб рогьо баччизе! Амма гьеб жиндир гуреблъи лъиданиги абичIо гьелъ ва гьитIичие гIоло гIумру гьабизе, инсул росуги тун, чияр бакIалде яхъана.
«ЭменгьечI», «къватIулъажо», «гъалмагъирчи» ва «хъурумсахъ» – гьел гурел батIиял рагIаби рагIуларо Мирзаханида. Хасаб рокьукълъигун гьесухъ ялагьула классалъул нухмалъулей Самеда. Васасул рекIел ахIвал-хIалалъул хIисабго гьабуларо гьелъ. ХъачIго кIалъан, ягъдон йикIуней гьелъ Мирзаханил эбелалдеги рогьрал рала. Огь, жакъасеб къоялъул бахъараб сураталъул мухIканлъи! МагIарул школаздаги дагьалищ ругел гьелда релълъарал учительзаби: къисмат бигъарал цIалдохъабаздехун гьединазул букIунеб бербалагьи цIакъ лъикI бихьизабуна артистка Рукъият Халидовалъ.
Инсанасул чорхол яхI-намус борцунеб далил гIарац кколин абула. Мирзахание машина бергьанин рагIараб мехалда ратула гьесул «унго-унгоял» эбел-эмен. Мирзаханил инсул сипаталъул хъантIлъи, гIарцул гуреб ургъел гьабунгутIи ва жиндирго мурадалъе гIоло цогидабщинаб кIочон тезе бегьулеблъи загьир гьабуна ДРялъул мустахIикъав артист ГIабдухаликъ ГIабдухаликъовас.
Эбелалда ва инсуда лъала жидер лъимералъул квешалги лъикIалги рахъал. Цо эбелалъ хьихьун гIурав гIолиласул циндаго ракана кIиго эмен, кIиго эбел. Вуго лъабабилев эменги – гьитIинаб къоялдаса нахъе кидаго аскIов ватулев вукIарав махул къебед Абакардаци (РФялъул мустахIикъав артист МухIамад НурмухIамадов). Машина бергьиналъул рохелдалде тIаде Мирзаханиде рещтIуна аслияб масъала: бечелъиялда хадув жив гьавурай эбелалда цадахъ шагьаралдейищ инев, гIолохъанлъиялъул берцинлъигун жанги кIочон тун, жиндие гIоло гIумру кьурай «адада» аскIовгойищ чIелев? Масъала тIубаялъе нух батула гьес. Ахиралдаги киналго «цIиратарал» умумузе мустахIикъаб жаваб кьола гьес.
Нухрикьуде ккарав гIолохъанчиясул рекIел ахIвал-хIалалъул хIалуцин, гьесул пикрабазул гъварилъи, гIумруялде бугеб бербалагьи махщалида бихьизабуна ХIайбула Хасаевас. А.П. Чеховасул гьадинал мухъал руго: «РекIел угьди, чорхол унти гIумруялда букIунебго хIалалда бихьизабизе ккола, ай хIатIал кьабгIезарун яги кверал хьвагIезарун гуреб, гьаракьалдалъун, берзул балагьиялдалъун…». ГIолохъанчиясул рекIелъ бижараб щибаб пикру гьурмадаса цIализе рес кьуна Хасаевас спектаклялъухъ балагьизе рачIарал гIадамазе. РакIбацIцIадаб, жеги чороклъиялъул чIчIва гъорлъе ккезе биччачIеб асар рещтIун буго гьесул рекIелъ мадугьалихъ гIолей Гулзарахъе (арт. ГIашура ИмангIалиева). Амма гьебги хIабургъинабизе къачIан рукIуна росуцоял.
Гьаб спектаклялъухъ балагьараб мехалда цебечIана 25 соналъ цебе гьелда гъорлъ гIахьаллъарал Авар театралъул актеразул къокъа. Гьезда гьоркьоса цIигьабураб спектаклялда хутIун вуго гIицIго РФялъул мустахIикъав артист ХIусен Казиев. Гьесул кIалдисан бачIараб калимаялда хадур нилъер гIадамал релъанхъизе ругьунлъун рукIин бихьана гьеб сордоялъги. Артистас хIалеб ролалда махсаро-хочIалъе бакI букIинчIо, гьесул багьадурасул гьурмада пашманлъиялъул асар бихьизе кколаан: лъимал гьечIев ригь арав чиясул букIараб инсулаб рохел чIвана гьесул лъади Диляраца рицарал гьерсал тIатараб мехалда. Къварилъиялъ къвал барав гьев нахъе уна.
«ГIумрудул кIичIа-гьетIарал нухазда букIунеб гьереси театралъ къватIибе чIвазабула ва гьелъул вахIшияб хIакъикъат халкъалда бихьизабула», - ян абуна Шиллерица. Аварт театралъул артистаз немцазул машгьурав драматургасул гьеб пикру цоги нухалда тасдикъ гьабуна.