Наши телефоны:
                       (8722)
681-454  681-496
 

Новости


<<все новости
22.09.2014
Маг1арулайлъун лъугьарай Людмила

Т1оцебе щвараб стипендиялъухъ гьелъ артистазул тукадаса босана грим, балеринабаз т1ад рет1унел пуанталилан ц1ар бутел мачуял, к1илк1ал, маххал, баргъичал, букъана кьурда- базул дарсиде рет1унеб форма.

Дида цадахъ ц1алараб щуябго соналъ Людмила йик1ана курсалъул старостаги, комсомолалъул цеехъанлъунги. Щализеги гьей лъик1ай йик1ана. Институталъул сценаялда гьелъ бергьенлъиялда х1ана "Аршин мал-аланалда" Теллил роль, "Силь­ва" абураб опереттаялда княгиня Волепюкил образ. Лъабабилеб курсалда ц1алулелъул ниж рач1ана, режиссеразул факультеталда ц1алулев вук1арав, гьанже театралъул режиссер Х1айбула Г1абдулгъапуровасул дипломалъул х1алт1илъун кколеб "Гуккарав рос" абураб спектакльги босун Буйнакскиялде. Цеетел Клодинал роль х1алеб бук1ана Людмилаца. Маг1арулаз къабул гьабуна спектакль. Авартеатралъул советалъ лъик1аб къимат кьуна Людмилае. Мах1муд Г1абдулхаликъовас гьел­да абуна: "Мун йиго Сидрат Мажидоваго г1адай комедиялъул ролал х1азе йигей артистка. Театр духъ балагьун ч1ун бук1ин к1очене биччаге", - ян.

Институт лъуг1арабго Людмила йосула Авартеатралъул коллективалде. Людмилае рес бук1ана г1урусазул бокьараб театралда х1алт1изе. Дагъистаналъул г1урусазул театралъул режиссерал гьелда к1алъанцин рук1ана жидехъе яч1ине бокьиларищилан. Кин бу- к1аниги, маг1арулазда гъорлъ г1урай йик1иналъги маг1арул театралдаса ц1ализе йит1арай йик1иналъги Людмила Авартеатралъе хилиплъич1о. Ахиралде щвезег1ан гьений х1алт1ана.

Ц1иял, ц1алун рахъарал артистазе театралъ босун бук1ана "Т1агьир ва Зугьра" абураб спектакль. Гьеб бук1а­на г1олохъанал артистазе к1удияб творчествоялъулаб экзаменлъун. Г1олохъабазги гьеб щуйил къиматалда кьуна. Шагьаралъул балагьулез гьеб кутакалда лъик1 къабул гьабуна. Гастролазул заманалда х1ана маг1арухъги. Людмилаца "Т1агьир ва Зугьраялда" х1алаан Юлдузилан ц1ар бу­гей бечедай, сих1ирай, къисас босизе г1ащикъай г1аданалъул роль.

Г1урусазул драматургасул пьеса бугони, режиссерас гьей г1ахьал гьайич1ого толароан. Музыкалияб комедия лъолеб бугониги, драма лъолеб бугониги, гьелъул г1ахьаллъиялъ спек­такль берцин гьабулаан. Гьелъие ц1акъ данде кколаан классикиял асараздасан г1уц1арал спектаклязул образал. Загьир гьабизе ккола гьединал ролал теат­ралда Людмилаца г1емерал х1ач1олъи. Людмилал эбел Прасковья ц1акъ ч1ух1ун йик1ана жиндирго ясалдаса, гьелъ абулаан "дир яс гьунар бугей йиго, гье­лъул х1урмат гьабе, воре гьей къварид гьаюгеян". Эбелалдаги лъик1 лъалаан маг1арул мац1.

"Бабал васищ" абураб спектаклялда Людмилаца х1алаан Бача Бачкуков­на абулей г1аданалъул роль. Гьей талих1къарай г1адан гьелъул хважаинас кьола цо г1ака босизе вачГарав, гьейго г1адав талих1къарав чиясе. Т1адежоялъе, дов ватула вигьунарев гьекъол- духъан. Гьей г1аданалъ гьев сах гьавизе больницаялда вегизавула, валагьула росасул цее йик1арай ч1ужуялъе гьавурав вас. Гьедин гьезул лъугьуна талих1аб хъизан. Г1адамазда жидерго талих1 батула гьединаб къваридаб, зах1матаб г1умруялдаса хадуб. Гье­лъул х1аялъухъ балагьун г1адамал релъулаан, г1одулаан, г1емер пикраби гьаризе т1амулаан, спектакль лъуг1а­рабго, аск1оре рач1ун баркала кьолаан. Балагьаразда лъалароан гьей г1урус миллаталъул яс йик1ин ва бицаниги божулароан. Людмилаца ц1акъ хехго босана маг1арулазул г1амал-хасият, рук1а-рахъин. Гьей лъугьана унго-унгояй маг1арулайлъун, Мух1умаг1алиева Людмилалъун.

Абич1ого г1оларо, гьелъ х1арал г1емерисел руччабазул г1амал-хасияталъул х1акъалъулъ. Гьел рукана киналалиго тамашаял руччаби, гьабулеб жоялда хадур гъоларел, кват1ун гурони абураб жо бич1ч1уларел, г1умруялъ къварид гьарурал: Ц1адаса Х1амзатил "Айдемир ва Умайгьанаталда" Симис - хан, "Ч1ужу яче, дир лаченаладаса" Допино, "Гьимиялъухъ миллионалдаса" Фиофилата, "Ханлъи бокьарай якьадалда" Бустан. Лъималазе лъурал спектаклязда гьелъ х1ана бог1оло, хъартай, херай к1одо, цо спектаклялда гьелъ х1ана цидул рольги. Гьединал ролал гьелъул репертуаралда г1емерал руго. Г1емерисел актрисабазе рокьуларо гьединал сурукъал ролал, Людмилаца режиссерасдаги гьарун росулаан гьел. Жиндирго актрисаялъул махщел Людмилаца гьединал ролазда бечедго ва гьарзаго рагьулаан. Гьелъул репертуаралда руго социалияб рахъ борхулел образалги. "Бияль гъул басуна" абураб спектаклялда Ванда, "Ракьалда жужах1" спектаклялда Барбара Стайн. Хут1арал ролал Людмилаца х1ана аслиязда хадусел. Гьел рук1ана г1адатиял ясазул ва руччабазул ролал. "Дег1ен Г1алиялда" - Надя, "Ирсилазда" - Асият, "Рек1ее бокьани" - Сувсар, "Рокьул сухъмахъалда" - Люба, "Дур- цазда" - Кану. Институталда ц1алулелъул дун Людмиладе данде х1азе кколаан. Курсалъе нухмалъи гьабулев Элизбар Дмитриевич Гедеванишвилица абулаан нуж театралдаги цадахъ xlaзе ккезе ругилан. Театралда ниж ц1акъго дать гурони спектаклязда цадахъ ккеч1о.

Цогидал г1адатиял г1адамаз баччулареб г1адаб къо баччизе ккола цо-цо мехалда артистаз. Бит1ун сценаялда роль х1алеб сордоялъ хвана гъелъул к1иго сон барав вас. Гьеб киналго артистазда лъалеб бук1ана цох1о гьелда хут1изег1ан. Спектакль лъуг1идал гьелда бицана ва киналго цадахъ гьелъухъе рилълъана къварилъи г1ахьал гьабизе. Гьеб буго бищунго артистасе зах1матаб заман. Гьединлъидал, театралъул жанисеб конституциялда хъван бук1уна спек­такль унеб заманалда актер телефоналде ах1унгут1изе, гьесухъе кагътал ва телег­рамма кьунгут1изе, к1алъазе гьезухъе щив вук1аниги виччангут1изе.

Людмилаца г1езаюна к1иго гьайбатай яс, кьуна гьезие лъик1аб тарбия, ц1ализе гьаруна ва ригьнаде т1орит1ана. Гьей жиндирго ясаздаса йохарай ва ч1ух1арай йик1ана. К1ияйго ясалъул россал руго маг1арулал. Театра­лъул х1алт1ухъабаз к1удияб х1урмат гьабулаан гьелъул. Щиб гьелъие къвариг1аниги, кумекалъе рортулаан. Аллагьас кьураб г1умру къокъаб ба­тана Мух1умаг1алиева Людмилал.

 

Х1усен КАЗИЕВ, Россиялъул мустах1икъав артист